.

Úrskurðarnefnd velferðarmála

Mál nr. 473/2020

Mánudaginn 5. október 2020

A og B

gegn

Vinnumálastofnun – Fæðingarorlofssjóði

Ú R S K U R Ð U R

Mál þetta úrskurða Kári Gunndórsson lögfræðingur, Arnar Kristinsson lögfræðingur og Þórhildur Líndal lögfræðingur.

Með kæru, dags. 29. september 2020, kærðu A, og B, til úrskurðarnefndar velferðarmála afgreiðslu Fæðingarorlofssjóðs vegna umsókna þeirra um greiðslur úr sjóðnum.

I.  Málsatvik og málsmeðferð

Kærendur sóttu um greiðslur úr Fæðingarorlofssjóði vegna væntanlegrar barnsfæðingar 6. október 2020. Með bréfi Fæðingarorlofssjóðs, dags. 10. september 2020, voru kærendur upplýst um að ráða mætti af upplýsingum úr staðgreiðsluskrá Ríkisskattstjóra að þau uppfylltu ekki skilyrði 1. mgr. 13. gr. laga nr. 95/2000 um fæðingar- og foreldraorlof, þess efnis að hafa verið í minnst 25% starfshlutfalli síðustu sex mánuði fyrir fæðingardag barns þar sem engar/lágar tekjur væru skráðar á þau á réttindatímabilinu. Kærendum var í framhaldinu leiðbeint um hvað teldist jafnframt til þátttöku á vinnumarkaði samkvæmt 2. mgr. 13. gr. a. laganna og gefinn kostur á að leggja fram gögn því til staðfestingar. Að öðrum kosti mættu þau eiga von á því að umsókn þeirra um greiðslur úr Fæðingarorlofssjóði yrði sett á bið.

Kæra barst úrskurðarnefnd velferðarmála þann 29. september 2020. Með erindi úrskurðarnefndar til Fæðingarorlofssjóðs 1. október 2020 var óskað eftir upplýsingum um hvort sjóðurinn hefði tekið endanlega ákvörðun í máli kærenda. Svar barst samdægurs þar sem fram kemur að ekki liggi fyrir synjanir í máli þeirra.

II.  Niðurstaða

Kærð er afgreiðsla Fæðingarorlofssjóðs vegna umsókna kærenda um greiðslur úr sjóðnum.

Samkvæmt 1. gr. laga nr. 85/2015 um úrskurðarnefnd velferðarmála skal nefndin úrskurða í kærumálum vegna stjórnvaldsákvarðana eftir því sem mælt er fyrir um í lögum sem kveða á um málskot til nefndarinnar. Þannig er grundvöllur þess að unnt sé að leggja fram kæru til úrskurðarnefndar sá að fyrir liggi stjórnvaldsákvörðun. Um stjórnvaldsákvörðun er að ræða þegar stjórnvöld taka ákvarðanir um rétt eða skyldur manna í skjóli stjórnsýsluvalds, sbr. 2. mgr. 1. gr. stjórnsýslulaga nr. 37/1993. Í 2. mgr. 26. gr. stjórnsýslulaga segir að ákvörðun, sem ekki bindur enda á mál, verði ekki kærð til æðra stjórnvalds fyrr en málið hefur verið til lykta leitt. Ákvarðanir sem teknar eru um meðferð stjórnsýslumáls og fela ekki í sér endalok málsins, svokallaðar formákvarðanir, verða því ekki kærðar til úrskurðarnefndarinnar.

Samkvæmt gögnum málsins lá ekki fyrir stjórnvaldsákvörðun í máli kærenda þegar kæra barst úrskurðarnefndinni. Að því virtu og í samræmi við 2. mgr. 26. gr. stjórnsýslulaga er það mat úrskurðarnefndarinnar að málið sé ekki tækt til efnismeðferðar. Kærunni er því vísað frá úrskurðarnefnd velferðarmála.

Úrskurðarnefndin bendir á að kærendur geta lagt inn nýja kæru til úrskurðarnefndarinnar þegar Fæðingarorlofssjóður hefur afgreitt umsóknir þeirra.

Ú R S K U R Ð A R O R Ð

Kæru A, og B er vísað frá úrskurðarnefnd velferðarmála.

F.h. úrskurðarnefndar velferðarmála

Kári Gunndórsson